Во списокот со улици има предлог со името на Данило Коцевски, а е добитник и на 13-то ноемвриската награда

Град Скопје реагираше на Фејсбук статусот на Огнен Коцевски, син на најпознатиот хроничар на градот Скопје, Данило Коцевски, кој напиша дека никој досега не му оддал почит на неговиот татко или какво било признание за неговиот труд.

„Сакаме да ја информираме јавноста дека името на Данило Коцевски е едно од имињата предложени во Листа за дополнување на Листата на имиња на улици, плоштади, мостови и на други инфраструктурни објекти на подрачјето на град Скопје, која ќе се најде пред Советот на Град Скопје на наредната седница. Имено, името на Данило Коцевски, книжевен критичар, раскажувач, романописец, драматург, поет и хроничар на Скопје, е дел од новата листа на предложени имиња (страница 46, реден број 250 – https://skopje.gov.mk/media/6522/spisok-na-ulici.pdf).

Градот Скопје отсекогаш го ценел придонесот на Коцевски како хроничар на Скопје, а тоа се гледа во поддршката на повеќе негови проекти во минатото, како и долгогодишната соработка во организирањето на свеченостите по повод 13 Ноември – Денот на ослободување на Скопје. Тој во 2008 година е избран за член на Одборот за одбележување на 45-годишнината од катастрофалниот земјотрес во Скопје на 26 јули 1963 година, под мотото „Скопје – 45 години град на солидарноста“, додека во 2010 година Коцевски е и именуван за член на Одборот за доделување на Наградата „13 Ноември“ на Град Скопје“, стои во соопштението од Град Скопје.

Дополнително, Коцевски е добитник и на Наградата „13 Ноември“ на Град Скопје за 1994 година од областа на публицистиката.

Синот Огнен претходно на Фејсбук го напиша следното:

„Мојот татко, Данило Коцевски, единствениот врвен хроничар на градот Скопје, скопска легенда, боем, кој напиша толку многу за Скопје, кој го даде срцето и душата на Скопје. Градот Скопје по неговата ненадејна смрт на 13 септември, не најде за згодно да му оддаде никаква чест, признание, ниту награда за делото за кое тој го даде целиот свој живот.“, напиша Огнен Коцевски на Фејсбук.

Back to top button
Close