ВИДЕО| Андоновиќ: Макрон во обид да договори ново парламентарно мнозинство – левичарите му најавуваат гласање недоверба
По губењето на апсолутното мнозинство во Парламентот на завчерашните парламентарни избори фрнацускиот претседател Емануел Макрон започна преговори со претставниците на политичките партии со цел да се дефинира стратегија која ќе биде во „интерес на Франција”.
Емануел Макрон / Фото: EPA-EFE/CHRISTIAN HARTMANN
Според извор во Елисејската палата, како што пренесуваат тамошни медиуми, „претседателот на Републиката е одлучен да дејствува во интерес на Французите”.
Републиканците и левичарското движење Нупес веќе позитивно одговориле на повикот на Макрон. Сепак дополнителен проблем за Макрон преставува и најавата на Француската левичарска коалиција „Нупес“ која најави дека планира на 5 јули да поднесе барање за недоверба на владата на францускиот претседател Емануел Макрон.
Коалицијата на Макрон не успеа да ги освои потребните 289 пратенички места од вкупно 577 за да го задржи апсолутното мнозинство. Коалицијата по вториот круг на парламентарните избори, одржани во неделата, доби 245 пратеници. Левиот блок Нупес ќе има најмалку 150 претставници. По нив следуваат екстремно десничарскиот Национален собир со историски резултат од 89 места, а по нив се Републиканците.
Француските медиуми посочуваат дека Макрон ќе бара сојуз или со конзервативните републиканци или ќе предводи малцинска влада која ќе мора за законите да преговара со другите партии од случај до случај.
Нупес, по завчерашните парламентарни избори, стана втора по големина политичка групација во Долниот дом на парламентот, но нема доволно гласови за да ја усвои иницијативата за недоверба и има малку сојузници во многу фрагментираниот парламент.
Судејќи според изјавите на Жан Лук Меланшон и Марин Ле Пен, нивна соработката не е можна.
Токму поради нивната нетрпеливост најверојатно Макрон ќе успее да направи мнозинство, но тоа со сигурност нема да биде стабилно.
