Запленета „нарко подморница“ со кокаин вреден 27 милиони долари

Подморницата е долга 15 метри и била на пат кон Централна Америка кога Колумбијците ја пресретнале, пишува CBS.

Морнарицата објави видео од операцијата за заплена, на која се гледа како офицер ги сече пакетите и ја испитува нивната содржина. Судејќи според видеото, многу од пратките биле означени како скорпија, додека други со ознаки Winnie и Carnal.

Трите лица кои управувале со подморницата се уапсени, а осомничените и дрогата биле пренесени во пристанишниот град Буенавентура, Колумбија. Властите не објавија информации за осомничените.

Во подморницата имало десетици пакувања скриени во различни прегради на подморницата, а тестовите на крајот покажале дека има околу 795 килограми кокаин, со проценета вредност од околу 27 милиони долари.

„Нарко подморниците“ се популарни кај трговците со дрога бидејќи потенцијално можат да избегнат откривање од страна на крајбрежната стража или други власти. Овие пловила никогаш не одат целосно под вода и често ги фаќаат во колумбиските води на пат кон САД или Европа.

Минатата година Колумбијците пресретнаа 20 „нарко подморници“

Колумбиската морнарица соопшти дека пресретнала вкупно 20 полуподморници во 2023 година, што доведе до запленување на 30 тони кокаин и повеќе од пет тони марихуана.

Во мај 2023 година, најголемата „нарко подморница“ забележана во Колумбија беше пресретната со три тони кокаин. Околу два месеци пред тоа, официјални лица заплениле подморница со две мртви тела и огромен товар со дрога во близина на брегот на Колумбија.

Back to top button
Close