Сашко Кедев продолжува да освојува врвови над 8.000 метри: Го искачи и кинескиот Шишапангма

Македонскиот кардиолог Сашко Кедев оствари уште еден голем успех во својата алпинистичка кариера откако го искачи врвот Шишапангма во Кина.

Станува збор за врв кој е висок 8.027 метри и се наоѓа во Тибет.

Организаторот на турата ги објави членовите на екипата која го искачила врвот, а помеѓу нив е и Кедев. Тимот покрај Кедев бил составен од седуммина Непалци, Американец, Јапонец и Пакистанец.

За Кедев ова е 12. врв над 8.000 метри, а годинава ги искачи Макалу, Лоце и Гашербрум 2. Како предизвик пред него остануваат само уште врвовите Кангченѕунга (8.586 метри) и Гашербрум 1 (8.068) за да ги комплетира сите врвови во светот со над 8.000 метри.