Европската комисија: Се зајакнува соработката за надгледување и контрола на странските директни инвестиции од трети земји кои ја загрозуваат безбедноста

Земјите-членки на Европската унија и Европската комисија ја зајакнуваат соработката за надгледување и контрола на странските директни инвестиции од трети земји кои ја загрозуваат безбедноста или јавниот поредок на ЕУ, се наведува во денешниот извештај на Комисијата.

Во четвртиот годишен скрининг извештај за странските директни инвестиции во Европската унија се забележува дека бројот на известувања за потенцијално сомнителни странски директни инвестиции е зголемен за 18 отсто од воспоставувањето на заедничката рамка на ЕУ во 2020 година.

Европската комисија само во ретки случаи мораше подетално да ги проценува странските инвестиции.

Во 2023 година биле пријавени 488 случаи, а огромното мнозинство од нив, поточно 92 отсто, биле затворени од страна на ЕК во рок од 15 дена, додека само осум отсто од случаите барале дополнителна безбедносна проценка.

Европската комисија успешно ги поттикнувала земјите-членки да усвојат и имплементираат ефективни национални контролни механизми за заштита на колективната безбедност на ЕУ, нејзините земји-членки и проектите и програмите на ЕУ од заеднички интерес, се вели во извештајот на веб-страницата на ЕК.