Над 150.000 Канаѓани потпишаа петиција да му биде одземено канадското државјанство на Маск
Повеќе од 150.000 луѓе од Канада потпишаа петиција со која бараат од нивната земја да му го одземе канадското државјанство на Илон Маск поради неговиот сојуз со Доналд Трамп, пишува Гардијан.
За време на неговиот втор мандат како претседател на САД, Трамп постојано се закануваше дека ќе ја претвори Канада во 51-та американска држава.
Авторката од Британска Колумбија, Квалија Рид, покрена петиција во Долниот дом на Канада, каде што беше поддржана од пратеникот на Нова демократска партија и отворен критичар на Маск, Чарли Ангус. Маск е роден во Јужна Африка, а има и канадско државјанство преку неговата мајка.
Петицијата на Рид, поднесена на 20 февруари, го обвинува Маск дека учествувал во активности насочени против националниот интерес на Канада додека дејствувал како советник на Трамп. Трамп ги налути Канаѓаните со заканите дека ќе воведат високи царини за канадските производи и изјавите за припојување на Канада кон САД.
Во петицијата се наведува дека соработката на Маск со Трамп го прави „член на странска влада која се обидува да го избрише канадскиот суверенитет“. Тие бараат од канадскиот премиер Џастин Трудо да му го одземе канадскиот пасош на Маск и веднаш да му го одземе државјанството.
Трамп често го исмејуваше Трудо нарекувајќи го гувернер, титула која им се доделува на лидерите на американските држави. На социјалната мрежа „Х“ што ја купи во 2022 година за 44 милијарди долари, Маск ги коментираше изјавите на канадскиот премиер дека ќе поднесе оставка како лидер на Либералната партија на Канада откако партијата ќе избере нов лидер.
Петициите како на Рид бараат 500 или повеќе потписи да бидат заверени за презентација во канадскиот дом на општините и потенцијално да предизвикаат официјален владин одговор. До денеска се собрани околу 167.000. Рокот за потпишување на петицијата истекува на 20 јуни.
