Обвинение за возачот што со слепило од 99 отсто и без дозвола усмрти жена на патот Пепелиште – Неготино со камион
За време на истражната постапка, како што се вели во обвинението, тој успеал и да ја продолжи возачката дозвола. Од тие причини, кавадаречното обвинителство, побара да се изврши проверка на начинот како обвинетиот ја стекнал возачката дозвола и инвалидската пензија, како да се испита веродостојноста на медицинската документација
Основното јавно обвинителство (ОЈО) Кавадарци поднесе обвинение против возачот што на 3 декември 2024 година со камион и истечена возачка дозвола, но и со утврдена попреченост – слепило од 99 отсто усмрти жена на регионалниот пат Пепелиште – Неготино.
Се гони за делото – тешки дела против безбедноста во сообраќајот.
Според образложението на обвинението за настанот, обвинетиот на 3 декември 2024 година на регионалниот пат Пепелиште – Неготивно управувал товарно моторно возило марка „цитроен џампер“ со истечена возачка дозвола и покрај тоа што имал утврдена попреченост – слепило, со 99 отсто намалена видна функција.
„На критичното место ‘Лаки‘ со ретровизорот од камионот удрил во главата на пешакот Ангелина Ангелова, која од ударот е отфрлена од патот и и се нанесени тешки телесни повреди, како сршување на черепот, пршлени и повеќе коски од што починала“,
велат од Обвинителството.
Кај оштетената, пак, е утврден одреден пропуст, бидејќи имала можност визуелно да го забележи товарното возило и навреме да го избегне. Но, тој пропист, според извршеното вештачење е од секундарен карактер.
Дополнително, во текот на истрагата, ОЈО Кавадарци утврдило дека обвинетитот е корисник на инвалидка пензија и додаток за попреченост, но сепак, управувал со возило.
За време на истражната постапка, како што се вели во обвинението, тој успеал и да ја продолжи возачката дозвола.
Од тие причини, кавадаречното обвинителство, побара да се изврши проверка на начинот како обвинетиот ја стекнал возачката дозвола и инвалидската пензија, како и да се испита веродостојноста на медицинската документација.
