Израелската армија почнува да ги преселува Палестинците. Подготвува напад врз градот Газа

Жителите на Газа ќе добијат шатори и друга заштитна опрема почнувајќи од утре пред нивното преместување од борбените зони во „безбедните“ зони на југот од енклавата, изјави портпарол на израелската армија.

Одлуката доаѓа неколку дена откако Израел објави дека има намера да започне офанзива за преземање на контролата врз северниот град Газа, најголемиот урбан центар на енклавата во кој живеат приближно 2,2 милиони луѓе, во план што ја вознемири меѓународната заедница.

Израелскиот премиер Бенјамин Нетанјаху изјави во неделата дека цивилното население ќе биде евакуирано во она што тој го нарече „безбедносни зони“ подалеку од градот Газа, кој го нарече последно упориште на Хамас, пред да биде започната офанзивата.

Обединетите нации и другите меѓународни хуманитарни организации ќе ја достават заштитната опрема преку преминот Керем Шалом во јужна Газа откако ќе биде проверен од персоналот на израелското Министерство за одбрана, соопшти војската.

Армијата одби да коментира дали опремата е наменета за жителите на градот Газа, кои бројат околу еден милион, и дали местото каде што ќе бидат преместени е во јужна Газа, Рафа, која се граничи со Египет. Израелскиот министер за одбрана Израел Кац изјави во саботата дека плановите за нова офанзива се уште се во фаза на изработка.

Сепак, израелските сили веќе ги засилија операциите во предградијата на градот Газа во текот на изминатата недела. Жителите на населбите Зејтун и Шеџаја пријавија тешки израелски напади и тенковски оган што уништи голем број куќи.

Израелската војска вчера соопшти дека започнала нова операција во Зејтун за лоцирање експлозиви, уништување тунели и убивање милитанти во областа.

Извор: nezavisen.mk