Германците би можеле да ги платат репарациите со вооружување на Полска
– Полскиот претседател Карол Навроцки, денеска, за време на посетата на Германија и Франција предложи Германија да плати 1,3 билиони евра воени репарации за уништувањето на Полска и германските злосторства за време на Втората светска војна со вооружување на полската армија и инвестирање во полската воена индустрија.
„Јас сум за тоа Германија да и исплати репарации на Полска. Тоа би бил почеток на долг процес. Тоа се уште не е готов рецепт, но Германија би можела да почне да исплаќа репарации со зајакнување на силата на полската армија. И со тоа истовремено зајакнување на она што сите ни е грижа, источното крило на НАТО“, изјави Навроцки пред полските новинари во Париз на крајот од неговата посета на Германија и Франција.
Прашањето за репарациите официјално го отвори сегашната конзервативна националистичка опозиција на партијата Право и Правда, од која доаѓа и Навроцки, пред три години кога беше на власт како дел од постојана кампања против Германија и Европската Унија.
Беше составен извештај за штетите, беше испратена нота до Германија, но во него не се споменува зборот репарации, туку компензација, а проевропската либерална влада на премиерот Туск смета дека 1,3 билиона евра е безнадежно барање, додека постои надеж дека делумната компензација може да се договори со Германија.
По Втората светска војна, Германија му плати воени репарации на Советскиот Сојуз, а преку неа тие отидоа и во Полска, а во 1953 година, под притисок на Москва, комунистичката влада на Полска се откажа од репарации, а за Германија прашањето беше правно затворено.
„Му кажав на претседателот Штајнмаер дека не може правно да се затвори бидејќи Полска не можеше да се откаже од репарациите во 1953 година. Во тоа време таа беше советска колонија под притисок на Москва“, рече денеска Навроцки.
Тој денеска им се заблагодари на германскиот претседател Франк-Валтер Штајнмаер и на францускиот претседател Емануел Макрон за брзиот солидарен сојузнички одговор на упадот на најмалку 19 руски беспилотни летала во ноќта на 10 септември во Полска.
„Им се заблагодарив на нашите партнери, и германски и француски, за брзата реакција по 10 септември, која покажа дека НАТО функционира. Разговаравме за темата за безбедноста на целото источно крило на НАТО“, рече Навроцки.
