МВР: При претрес во велешко пронајдена дрога, приведени две лица

Полициски службеници од Отсекот за недозволена трговија со дрога и оружје при СВР Велес вчера лишиле две лица од Скопје, откако при претрес во куќа во село Карабуниште, велешко, биле пронајдени повеќе кофи и вреќи со марихуана, машина за обработка на стебла и пиштол.

Лицата, како што информира МВР, се задржани во полициска станица и известен е јавен обвинител, а по документирање на настанот против нив ќе бидат поднесени соодветни пријави.

-На 27.09.2025 во 18:00 часот, полициски службеници од Отсекот за недозволена трговија со дрога и оружје при СВР Велес ги лишија од слобода Г.Л.(46) и Г.Д.(39), двајцата од Скопје. По претходно добиени сознанија, а врз основа на наредба од Основен суд Велес, извршен е претрес викенд куќа и помошни простории во атар на село Карабуниште, велешко, кои ги користи Г.Л.. При претресот, во близина на викенд куќата се затекнати Г.Л. и Г.Д. како од нива откопуваат стебла од растението канабис, а пронајдени се и повеќе кофи и вреќи со марихуана, машина за обработка на стебла канабис и пиштол, се вели во соопштението од МВР.