Апасиев со писмо до членството и симпатизерите: Да продолжиме напред, со збиени редови – без кукање и лелекање!
Претседателот на Левица, проф. д-р Димитар Апасиев упати писмо до своето членство и симпатизери со силна и борбена порака дека патот кон победата продолжува и покрај, како што се вели во писмото, „илегалната цензура“ за време на оваа изборна кампања.
„Со илегалната цензура во оваа изборна кампања се потврди нашето претчувство – вмроидниот режим се плаши од нашата заедничка борба против елитите. Точно знаат од каде доаѓа опасноста. Се плашат од вистинската опозиција. Од обединета и силна Левица!“, се наведува во писмото.
Апасиев порачува дека секој ден во оваа неправедна кампања за Локалните избори 2025 претставува доказ за нивната решителност, истрајност и непоколебливост.
„Знаеме дека патот дотука не беше лесен, но знаеме и дека солидарноста, правдата и чесноста овојпат имаат голема шанса за победа“, стои во обраќањето.
Во обраќањето исто така се потенцира дека Левица се профилира како втора политичка сила во државата и дека младоста, неподмитливоста и креативноста се на нивна страна.
„На нивна страна се олигарсите, богаташите и корумпираните. Нашата кауза е праведна! Да не се откажеме. Да одиме напред. Непоколебливо. Со чиста совест и цврста волја“, се додава во пораката.
Апасиев ја дефинира партијата како свежина на, како што вели, „мувлосаната политичка сцена“.
„Неа со ништо не можете да ја запрете! Нашата генерациска должност е јасна: да ја продолжиме оваа нерамна битка против привилегираните кои со децении ги ограбуваат и народот и Републиката. Додека тие безобразно се богатат од нашиот труд – само со сплотеност, упорност и истрајност можеме да изградиме општество на социјална правда и благосостојба за сите“, порачува лидерот на Левица.
Во писмото дополнително се нагласува значењето на секој член во овој, како што се нарекува, историски момент.
„Затоа, секој од нас е важен. Да бидеме смирени во опасноста! Скромни и постојано претпазливи. Да бидеме несовладливи во офанзивата. Да останеме посветени, организирани и мобилизирани! Да бидеме секој ден на улиците. Меѓу народот, таму каде што припаѓаме. Да продолжиме напред, со збиени редови – без кукање и лелекање. Нема паѓање во духот! Победата наша не е далеку“, стои во пораката на Апасиев.
