Арсовска: Стратегијата на политичарите е раздор со меѓусебни националистички напади

Екс-градоначалничката на Скопје, Данела Арсовска ги коментираше неодамнешните пораки на лидерот на едното крило на Алијанса за Албанците, Зијадин Села. Арсовска тврди дека дел од политичарите, со постојаните меѓусебни националистички напади намерно создаваат раздор меѓу Македонците, Албанците, Турците, Ромите, Србите, Бошњаците…

-Тоа им е стратегијата, ако нема леб, дај му на народот омраза. Некој ќе возврати, не затоа што му е грижа, туку само за да си крене рејтинг кај Македонците, затоа што кога нема идеи, нема визија и нема проекти за подобар живот, тогаш најлесно се опстојува со поделби, тврди Арсо

Според неа, ќе биде интересно во моментот кога сите што чесно живеат и работат во Македонија, ќе станат свесни дека од прв до последен се исти само ги менуваат местата.

-Целата стратегија им е со раздор и дефокус мирно да крадат милиони и да владеат, додека на народот му ги поскапуваат струјата, парното, водата, здравјето и самиот живот, потенцира поранешната градоначалничка.

Лидерот на едното крило на АА, гостувајќи во емисијата „Кавга со Иван“, изнесе став поврзан со историските пописи на Балканот за време на Отоманската империја. Според неговото толкување, во последниот османлиски попис, Македонците не биле заведени како посебна етничка категорија.

Села говореше за етничката структура во регионот, албанскиот идентитет и историските околности на Балканот. Во дискусијата, тој се повика на административните регистри на Отоманската империја, нагласувајќи дека тие ја класифицирале популацијата првенствено според вероисповед, а не според денешните дефиниции за национален идентитет.