Ситуацијата со НИС и понатаму неизвесна, Вучиќ најави за денеска важен состанок
Претседателот на Србија, Александар Вучиќ, за денеска најави важен состанок за ситуацијата во Нафтената индустрија на Србија (НИС) чија рафинерија во Панчево официјално треба да биде исклучена утре доколку нема позитивен одговор од САД.
Од Стејт департментот и канцеларијата на OFAC зависи дали лиценцата за работа на НИС ќе биде продолжена и дали рафинеријата ќе продолжи да работи.
„Не можеме да одлучиме што да правиме во име на Русите…Ако лиценца од САД не добиеме, ќе мораме на различни начини да обезбедиме нафта и нафтени деривати во следниот период“, изјави Вучиќ.
„Ќе имаме важен состанок каде што ќе ги решиме сите тие проблеми. Сметаме дека Американците воопшто нема да се изјаснат, ќе кажат дека не добиле доволно информации и затоа чекаат и секако не им е грижа колку штета е направена во Србија. Русите не брзаат премногу бидејќи за нив најважно е нивниот имот да остане што е можно подолго, а дали ќе остане и како ќе биде кај нас е друго прашање“, рече Вучиќ.
Тој рече дека нема причина за паника кај граѓаните.
Веќе 54 денови се во сила американските санкции врз НИС што е во мнозинска сопственост на Русија.
Србија чека одговор од американскиот Стејт департмент и од Канцеларијата за контрола на странски средства (OFAC) за продолжување на лиценцата за НИС, додека рафинеријата во Панчево се уште е во фаза на топла циркулација, а државата го зголемува увозот на деривати.
Бојан Станиќ од Српската стопанска комора за РТС изјави дека би било големо разочарување доколку лиценцата за НИС не биде продолжена.
Доколку се случи негативно сценарио, тој вели дека запирањето на работата на рафинеријата за краток временски период нема да биде проблем. Сепак, тој истакнува дека сето ова ја намалува вредноста на НИС.
