Секретарот за војна на САД за нападите врз нарко-терористите: Ова е само почеток
Американскиот секретар за војна Пит Хегсет, на денешниот состанок на Кабинетот на претседателот Доналд Трамп изјави дека САД „ова е само почеток“ на нападите врз наводните чамци со дрога и нарко-терористите, нагласувајќи дека тие ќе бидат ставени „на дното на океанот“.
– Ние штотуку почнавме да напаѓаме чамци со наркотици и да ги ставаме нарко-терористите на дното на океанот, бидејќи тие го трујат американскиот народ, рече Хегсет.
Коментарите на Хегсет доаѓаат откако тој се соочи со двопартиски критики поради извештаите дека американската војска убила двајца преживеани од претходниот напад врз чамец осомничен за пренесување дрога во Карипското Море во септември.
Белата куќа денеска призна дека бил нареден втор напад врз чамецот што веќе бил погоден од војската во Карипското Море, а Еј-Би-Си њуз посочи дека како резултат на тоа биле убиени преживеаните од првичниот напад.
Изјавата на Хегсет дојде само неколку дена откако Си-Ен-Ен и други медиуми објавија дека таканаречениот „двоен напад“ (double-tap strike) во септември ги убил преживеаните од првичниот напад врз наводниот брод со дрога, покренувајќи прашања дали вториот напад претставува воено злосторство.
Портпаролот на Пентагон, Кингсли Вилсон, за време на одделен настан денеска рече дека Хегсет и Трамп се крајните „наредбодавачи“ за какви било напади извршени од американската војска против наводните чамци со дрога, но ја повтори позицијата на администрацијата дека командантот е тој што ја донел одлуката да спроведе следен напад.
Во меѓувреме, и републиканските пратеници ги изнесоа своите ставови за контроверзниот напад и ескалацијата на тензиите со Венецуела.
Претседателот на Претставничкиот дом, Мајк Џонсон, се воздржа од критики за двојниот напад, велејќи дека нема да ги „прејудицира“ деталите од контроверзниот инцидент што е предмет на истрага од конгресните комисии.
Сенаторот Ерик Шмит, член на Комитетот за вооружени служби на Сенатот, силно ја бранеше администрацијата за спроведувањето на нападот. Шмит тврди дека целта на Трамп за чамците со дрога е „јасно во рамките на неговите овластувања од Членот II“ на Уставот.
Сенаторот Џон Тун ги бранеше напорите на администрацијата да го отстрани од власт венецуелскиот претседател Николас Мадуро. – Станува збор за режим што ги прекршува законите и доведува во опасност многу американски граѓани преку трговијата со дрога, рече тој. – Мислам дека акциите што ги презедоа се соодветни, и согласно нашите и меѓународните закони, изјави Тун.
Дополнително, САД побараа Венецуела да прифати депортациски летови оваа недела, според соопштението објавено денеска од Венецуелската аеронаутичка управа (ВАА). Барањето доаѓа откако Трамп во саботата побара воздушниот простор на Венецуела да се смета за „целосно затворен“. ВАА во објава на Инстаграм соопшти дека добила барање од американската Влада за обновување на „репатријациските летови“ на венецуелски мигранти.
