Американската државна обвинителка Пам Бонди бара истраги за екстремистичките групи во САД
Главната американска обвинителка, Пам Бонди, синоќа им наложи на обвинителите и другите надлежни органи да ги засилат истрагите против антифашистичкото движење Антифа и сличните „екстремистички групи“ и побара од ФБИ список на актери кои може да бидат вклучени во домашен тероризам, се дознава од интерен меморандум до кој дојдоа британските медиуми.
По убиството на активистот Чарли Кирк, Трамп ја прогласи Антифа за терористичка организација
Во документот на обвинителката Бонди се бара од Министерството за правда да ги направи истрагите за домашен тероризам и даночни измами како своја приоритетна задача.
Наредбата доаѓа неколку месеци по убиството на конзервативниот политички активист Чарли Кирк, кратко откако претседателот Доналд Трамп потпиша извршна наредба со која ја прогласи Антифа за терористичка организација.
„Домашните терористи користат насилство или закана од насилство за да ги постигнат своите политички цели и да промовираат екстремни ставови за масовната миграција и отворените граници, радикалната родова идеологија, антиамериканизмот, антикапитализмот и антихристијанството“, се наведува во писмото на државната обвинителка.
Министерството за правда не го коментираше наведеното писмо.
Бонди, исто така, им нареди на федералните агенции за спроведување на законот да ги преразгледаат своите досиеја и да извлечат разузнавачки информации за антифа групите, кои потоа ќе им ги достават на истражителите.
Таа побара од ФБИ да ги истражи сите инциденти од изминатите пет години што содржат елементи на домашен тероризам. Откако ФБИ ќе состави список на актери кои може да бидат вклучени во домашен тероризам, нивната следна задача е да смислат нови стратегии што ќе „разградат цели мрежи на криминални активности“.
Дополнително, ФБИ треба да го подобри својот систем за пријавување, така што „сведоците и граѓанските новинари можат да испраќаат сомнителни акти на домашен тероризам до медиумите“. Во писмото, исто така, се повикуваат агенциите што доделуваат грантови да им дадат приоритет на федералните држави и градови кои имаат програми за заштита од домашен тероризам.
