Глобалната несигурност расте: Што открива Светскиот социјален извештај 2025?

Светот влегува во период на длабоки општествени промени, а најновиот Светски социјален извештај 2025 на Обединетите нации јасно покажува дека глобалната несигурност станува новата нормала. Иако живееме во време на технолошки напредок, побрза комуникација и поголема економска продуктивност, довербата во институциите опаѓа, социјалните разлики се продлабочуваат, а чувството на несигурност расте во сите региони.

Една од најсилните пораки на извештајот е дека економската нееднаквост се претвора во општествена нестабилност. Иако глобалните економии формално растат, многу луѓе не го чувствуваат тој напредок. Растот на трошоците за живот, несигурните работни места, и недостапноста на квалитетни јавни услуги прават голем дел од населението да се чувствува ранливо,дури и во земји со релативно високи приходи.

Во извештајот се предупредува дека недовербата во институциите од владите до медиумите, достигнува рекордно ниво. Овој пад на довербата не е само емоционален, туку создава реални предизвици за управување со кризи, креирање политики и одржување на стабилност. Кога луѓето не веруваат во институциите, секоја криза се мултиплицира: економската станува политичка, а политичката преминува во општествена.Според податоците, социјалната мобилност е во застој, особено кај младите.

Сѐ поголем дел од младата генерација чувствува дека „работи понапорно, но добива помалку“ , реалност што го поттикнува растот на разочараност, иселување и чувство на бесперспективност. Ова е особено изразено во региони кои се борат со висок јавен долг, силна неформална економија или недоволно инвестирање во образованието.

Интересно е што извештајот истакнува и позитивна страна: општествата со силни јавни институции, социјални системи и еднаков пристап до ресурси покажуваат поголема отпорност кон кризи. Земјите кои инвестираат во образование, здравство, социјална заштита и локални заедници успеваат да одржат повисоко ниво на доверба — што го намалува ризикот од конфликти, поларизација и социјални тензии.

Исто така, се потенцира дека идните политики мора да бидат насочени не само кон економски показатели, туку и кон квалитетот на живот, чувството на сигурност и социјална праведност. Во еден свет каде кризите се поврзани — економски, климатски, политички — одржливото општество мора да се темели на доверба, еднаквост и солидарност.

Светскиот социјален извештај 2025 на крајот носи јасна порака: ако сакаме стабилни општества, мора да градиме системи кои еднакво ги штитат сите, а не само малцинство.

Извор: trn.mk