Србин ја бара во Скопје првата љубов на татко му од 1985 година

Видеото го објави млад човек од Србија, чиј профил се вика lbosnic.9, со приказна што започнала пред точно четири децении.

Неговиот татко и девојка по име Емилија се запознале на работна акција во Ѓердап во 1984 година. Тоа било време кога случајните средби траеле подолго од летото, кога писмата биле поважни од телефонските повици и кога еден единствен мост можел да стане симбол на сè што можело да биде и не било.

Во видеото што го објавил, има три фотографии – три траги што би можеле да водат до Емилија.

На првата фотографија е прикажан стариот мост во Скопје, со пораката:

„Сè започна тука, во Скопје во 1985 година.“

Мостот е местото каде што се виделе последен пат, каде што се разделиле и каде што приказната тивко завршила, иако ниту еден од нив не го знаел ова во тоа време.

Втората фотографија е вистинско богатство: писмо што Емилија му го испратила на својот татко. Ракопис од осумдесеттите години, нежни зборови и постскриптум што денес го крши срцето:

„Многу топли поздрави до тебе и твоите. Емилија. П.С. Јави ми се кога ќе дојдеш, сè друго е средено.“

Третата фотографија го прикажува таткото во младоста, со прашањето:

„Можеме ли да ја најдеме Емилија?“

И потоа се случи она што социјалните медиуми најдобро го знаат, заедницата се собра околу приказната. Луѓе од Србија, Македонија и дијаспората се појавуваат во коментарите. Испраќаат слики, линкови и профили на жени со името Емилија Георгиевска. Многумина се сеќаваат на Скопје од тоа време, прашуваат за работни акции, споделуваат совети како да ја шират веста.

Иако младиот човек контактирал со некои жени чии профили им ги испратиле следбениците, засега нема повратни информации.

Младиот човек објасни дека неговите родители се развеле пред 15 години, мирно и без горчина.

Извор: slobodenpecat.mk