Иранскиот министер за надворешни работи нема да присуствува на форумот во Давос поради репресиите, објавија организаторите

Иранскиот министер за надворешни работи, Абас Арагчи, нема да присуствува на Светскиот економски форум во Давос поради репресијата врз демонстрантите во Исламската Република, соопштија организаторите.

„Иако неговата покана беше испратена минатата есен, со оглед на трагичната загуба на животи во Иран минатата недела, владата во Техеран не може да биде претставена на форумот“, напиша СЕФ на Х.
Се очекуваше Арагчи да учествува на настан закажан за утре.

Од почетокот на масовните протести во Иран, околу 4.000 луѓе се убиени, според податоците од Информативната агенција на активисти за човекови права (HRANA), американска невладина организација. Оттогаш, потврдено е дека загинале 3.919 лица – од нив 3.685 демонстранти и 178 припадници на безбедносните сили; во исто време, се разјаснуваат околностите околу смртта на уште 9.000 луѓе.

Тие бројки не можат независно да се потврдат.

Британскиот весник „Сандеј тајмс“ објави дека меѓу 16.500 и 18.000 луѓе биле убиени. Бројките се базираат на информации од осум од најголемите очни клиники во Иран и 16 одделенија за итни случаи.