Папата Лав XIV одби да го прими Емануел Макрон на аудиенција

Папата Лав XIV одлучил да не го прими францускиот претседател Емануел Макрон на аудиенција, објавува италијанскиот весник „Il Tempo“, повикувајќи се на извори од Државниот секретаријат на Ватикан и надбискупот Џовани Чезаре Пагацио.

Според тие извори, подготовките за првата државна посета на Макрон во Ватикан, кои траеле неколку недели по барање на Елисејската палата, биле запрени по наредба на самиот папа, а надлежните канцеларии добиле упатство да го вратат барањето за аудиенција.

Папата, како што се наведува, исто така порачал дека во овој момент нема да се одржуваат ниту приватни, ниту државни аудиенции за Макрон.

Според изворите, причините за одбивањето се повеќекратни, а меѓу клучните се истакнува незадоволството на папата од законодавниот курс на Франција по прашањата на етика и човекови права, особено законите за еутаназија кои неодамна ги донела француската влада.

Дополнителен товар во односите претставува, според истите извори, ставот на Ватикан кон, како што е наведено, изразениот антиамериканизам во Франција, како и незадоволството на папата од изјавите на Макрон за Соединетите Американски Држави, со оглед на тоа што папата е со американско потекло.

Како уште еден извор на тензии се наведува одлуката, која Макрон ја донел во координација со парискиот надбискуп Лоран Улрих, да се отстранат и преработат преостанатите стари витражи во катедралата Нотр Дам за да се постават нови, современи дела.

Таа одлука предизвикала протести од културни и католички здруженија во Франција, а според изворите, наишла и на незадоволство кај папата.