Јоханес Хан: Нема попуст за Србија, сите земји-кандидатки мора да ги исполнат стандардите за влез во ЕУ
Поранешниот комесар на Европската комисија, Јоханес Хан, изјави за НИН дека нема попусти за пристапување кон Унијата туку дека секој мора да ги исполни нејзините стандарди, нагласувајќи дека Србија има многу отворени прашања.
– Пристапувањето кон семејството на ЕУ е фундаментална одлука, и за земјата кандидат и за самата Унија. Ако зборуваме за Србија, се уште има многу отворени прашања, меѓу другото, прилично низок степен на усогласеност во областа на надворешната политика со политиката на Брисел – рече Хан во интервјуто за НИН.
Во врска со можноста сите земји од Западен Балкан во пакетот да бидат примени во ЕУ по итна постапка, тој рече дека „процесот на пристапување на секоја од земјите кандидати за ЕУ е индивидуален и се базира на заслуги, на исполнување на стандардите што ги бара членството во Унијата“.
– Од друга страна, земјите-членки на ЕУ исто така мора да го направат својот дел, тие мора да се подготват за Унијата со повеќе од 30 земји, а за тоа е потребна промена во системот на донесување одлуки. Потребно е да се воведе донесување одлуки со квалификувано мнозинство наместо едногласно. Но, навистина очекувам Унијата да одржи силна посветеност на пристапувањето на земјите од Западен Балкан – додаде Хан.
Како што рече, „ако целиот регион на Западен Балкан стане дел од европското семејство, тоа би била win-win ситуација, и за земјите од регионот и за ЕУ“ и нагласи: „Но, за да се постигне ова, земјите-кандидатки мора да ги исполнат стандардите за прием, не можеме да се откажеме од нашите стандарди“.
На прашањето дали безбедноста, економската и политичката стабилност на Унијата се сè уште поважни од инсистирањето на исполнување на стандардите, со оглед дека се споменуваат Молдавија и Украина во ЕУ, иако тие заостануваат зад земјите од Западен Балкан во однос на исполнувањето на стандардите, тој рече дека го гледа тоа поинаку.
– Дискусијата за Украина и Молдавија иницираше нова динамика во целиот процес на проширување на ЕУ. Како што веќе реков: не може да има отстапки – секоја земја-кандидат мора да го исполни она што е потребно, она што се бара од неа, т.е. заедничките стандарди што важат во Унијата – рече Хан.
Зборувајќи за војната на европско тло, тој оцени дека „значајна и ефикасна воена поддршка за Украина е неопходна за нејзин крај, што би имало одвраќачки ефект врз Русија и што би довело до прекин на огнот и преговори“.
