НАСА го одреди 6 март како најран датум за испраќање астронаути околу Месечината
НАСА денеска повторно изрази оптимизам откако втората копнена проба за нејзината мисија за испраќање екипаж околу Месечината веќе следниот месец покажа значителен напредок по претходните технички проблеми.
Администраторот на НАСА, Џаред Исакман, на Х соопшти дека втората таканаречена „влажна генерална проба“ (wet dress rehearsal), симулација на целосно одбројување за лансирање без полетување, претставува „голем чекор кон враќањето на Америка во лунарната средина“.
Лори Глејз, менаџер во НАСА, изјави дека поправките на проблемите регистрирани за време на претходните тестирања се покажале како ефикасни. Таа рече дека речиси сите процедури биле завршени според планираното и во рамките на очекуваната временска рамка, иако сè уште треба да се решат некои помали прашања.
Американската вселенска агенција соопшти дека најраниот можен датум за лансирање сега е одреден за 6 март 2026 година. Се очекува екипажот деновиве да влезе во карантин.
Мисијата „Артемис 2“ (Artemis 2) е планирана да испрати астронаути во близина на Месечината за првпат по повеќе од половина век. Американските астронаути Кристина Кох, Виктор Гловер и Рид Вајсман, заедно со канадскиот астронаут Џереми Хансен, треба да летаат околу Месечината за време на мисијата која ќе трае околу 10 дена.
НАСА претходно го планираше лансирањето за најрано 6 февруари. Меѓутоа, за време на првата целосна проба во вселенскиот центар Кејп Канаверал на почетокот на февруари, беа откриени протекувања на водород. Подоцнежниот помал тест повторно наиде на проблеми со полнењето на водород, што ги принуди инженерите да го заменат филтер-системот.
