Бразил не сака нова Студена војна, изјави претседателот Лула да Силва

Бразил не сака „нова Студена војна“, изјави денеска претседателот Луиз Инасио Лула да Силва.

„Сакам да му кажам на американскиот претседател Доналд Трамп дека не сакаме нова Студена војна. Не сакаме да се мешаме во работите на која било друга земја, сакаме еднаков третман за сите земји“, рече Лула на прес-конференција во Њу Делхи на крајот од тридневната посета на Индија.

Тој изјави дека очекува да се сретне со Трамп во Вашингтон во првата недела од март, додавајќи дека дневниот ред ќе вклучува трговија, имиграција, инвестиции и партнерство меѓу универзитетите.

Левичарскиот јужноамерикански лидер има различни ставови со Трамп за прашања, како што се царините на САД, израелската војна во Газа, апсењето на венецуелскиот претседател Николас Мадуро и Советот за мир на Трамп.

Лула одби да коментира за одлуката на Врховниот суд на САД донесена завчера со која беа поништени многу од царините на Трамп за странска стока, за кои Трамп потоа рече дека ќе бидат заменети со царини од 15 проценти според друг закон. Тој само рече: „Мислам дека односите меѓу САД и Бразил ќе бидат во подобра позиција“.