Вашингтон пост: САД брзо го зголемуваат бројот на авиони во опкружувањето на Иран
Американската војска брзо го зголеми бројот на воени авиони за евентуален напад врз Иран, објавува американскиот весник „Вашингтон пост“, повикувајќи се на јавно достапни податоци за летовите на авионите и сателитските снимки.
Весникот наведува дека во текот на изминатата недела, повеќе од 150 американски воени авиони се преместени во бази во Европа и Блискиот Исток, по неуспешниот втор круг преговори меѓу САД и Иран на 17 февруари.
„Вашингтон пост“ пишува дека сегашното присуство на американските сили во близина на Иран е меѓу најголемите од пред војната во Ирак, која се одржа пред повеќе од дваесет години.
По големите протести во Иран во јануари, американскиот претседател Доналд Трамп постојано се закануваше дека ќе го нападне Иран доколку двете земји не се согласат за иранската нуклеарна програма.
Иранските претставници изјавија дека е можен договор, но дека ќе биде потребно време.
Американскиот весник пишува дека експертите кои го следат распоредувањето на американските трупи проценуваат дека нивниот состав и број „укажуваат на повеќедневна кампања без копнена инвазија“.
„Самото ниво на сила што е акумулирано значи дека американската војска може да спроведе што и да одлучи Трамп, од одржлива, многу кинетичка кампања, до насочени, ограничени напади“, рече поранешната заменик-помошничка секретарка за одбрана за Блискиот Исток, Дана Штраул.
Меѓутоа, Марк Кансијан, виш советник во Центарот за стратешки и меѓународни студии, верува дека ако американската администрација „планира продолжена, повеќенеделна воздушна кампања, ќе бидат потребни уште повеќе воени средства“.
Вашингтон моментално има повеќе од десет воени бродови на Блискиот Исток: носачот на авиони Абрахам Линколн, девет разурнувачи и три крајбрежни борбени бродови.
Носачот „Џералд Форд“, најголемиот носач на авиони во светот, денеска пристигна во американската поморска база во близина на Крит, на пат кон Блискиот Исток.
„Вашингтон пост“ наведува дека е реткост два американски носачи на авиони да бидат на Блискиот Исток истовремено, носејќи десетици воени авиони и екипаж од илјадници морнари.
Два големи американски воени брода беа во регионот во јуни минатата година, кога три ирански нуклеарни објекти беа бомбардирани во поддршка на Израел за време на 12-дневната војна со Иран.
