Трамп најавува разговори со новото раководство на Иран

Американскиот претседател Доналд Трамп изјави дека новото раководство на Иран сака да воспостави контакти со неговата администрација и дека тој планира да го стори тоа.

– Тие сакаат да разговараат и јас се согласив да разговарам, па затоа ќе разговарам со нив. Требаше да го направат тоа порано. Требаше да го дадат она што беше многу практично и лесно да се направи порано. Чекаа предолго – изјави Трамп во интервју за списанието Атлантик.

Трамп не откри детали за тоа кога точно ќе се одржат разговорите.

Претходно, во интервју за Фокс њуз, тој истакна дека во тековните американско-израелски напади врз Иран биле убиени 48 ирански лидери.

– Никој не може да поверува во успехот што го имаме. 48 лидери исчезнаа одеднаш. И се одвива брзо – нагласи Трамп.

Во посебно интервју за Си-Ен-Би-Си, тој оцени дека американската операција во Иран се одвива „пред предвидениот рок“, без да навлегува во дополнителни детали.

Од друга страна поранешниот престолонаследник и син на последниот шах на Иран, кој беше соборен од Исламската Република во 1979 година, напиша на „X“ дека смртта на врховниот лидер на Иран не е „крајот“, а ги повикува Иранците да ја „соборат“ Исламската Република.

Тој вели дека народот мора да се подготви за „широко распространето и решително присуство на улиците“ и ги замолува да скандираат од своите домови ноќе.

Пахлави претходно ги повика иранските власти да се „предадат“, а војската и органите за спроведување на законот да го користат своето оружје за да ја „одбранат големата нација Иран“, а не „републиката на криминалот“ за побрзо да го завршат „кошмарот“.

За време на неодамнешните антивладини протести во Иран, Пахлави се појави како истакната опозициска фигура, а демонстрантите на некои локации го скандираа неговото име.

Извор: fokus.mk