Последните часови на Али Хамнеи: Како беше изведен атентатот во срцето на Техеран
Животот на Али Хамнеи висеше на конец минатата година. Имено, за време на 12-дневната војна меѓу Израел и Иран, израелските функционери имаа можност да го ликвидираат ајатолахот. Но, потоа Доналд Трамп го спречи нападот и ги принуди Иран и Израел на кревко примирје, пишува британски „Телеграф“.
Осум месеци подоцна, преговорите за ограничување на нуклеарните и ракетните програми на Иран се во застој. Американскиот претседател го изгуби трпението, а на Хамнеи му истече времето.
Иранските државни медиуми потврдија дека Хамнеи е убиен во саботата наутро за време на состанок во центарот на Техеран, заедно со најмалку пет високи функционери на иранскиот режим, кога израелските сили фрлија десетици бомби врз неговиот комплекс.
Во исто време, напади беа извршени на најмалку две други локации во градот, со цел, како што велат изворите, „да се отсече главата на змијата“. Снимките покажаа густи облаци чад над Техеран што се издигаа од урнатините на канцеларијата на Хамнеи и нејзиниот комплекс, толку дебели што го блокираа сонцето.
Сателитските снимки покажуваат дека голем дел од зградата е срамнет со земја. Според извештаите, телото на поранешниот врховен лидер, изрешетано со шрапнели, било извлечено од урнатините. И Трамп и израелскиот премиер Бенјамин Нетанјаху наводно виделе фотографии од неговото тело.
По обидот за атентат од минатата година, Хамнеи сè повеќе се повлекуваше од јавноста. Дури и неговите објави на социјалните мрежи станаа спорадични. Бункерот во неговиот комплекс е толку длабок што на лифтот, според извештаите, му требаат повеќе од пет минути за да стигне до него. Можностите за напад биле ретки, но на неговите непријатели им требало само една.
Израел и САД биле принудени да ги забрзаат плановите кога процениле дека се отворила можност за елиминирање на врвот на иранскиот режим.
Ретроспективно, се чини неверојатно ризично за врвните функционери на иранскиот режим да се концентрираат само на неколку локации, особено во време кога САД ги распоредуваа своите најголеми воени сили на Блискиот Исток од војната во Ирак.
…
