Оштетен руски танкер за гас неконтролирано плута кон италијанскиот остров Лампедуза

Оштетен танкер за течен гас од Русија неконтролирано се движи кон италијанскиот остров Лампедуза без екипаж, соопштија денеска властите на Малта.

Управата за поморство на Малта соопшти дека 277 метри долгиот Arctic Metagaz може да претставува опасност за другите бродови и веројатно не е во состојба да маневрира. Бродовите се информирани да го избегнуваат оштетениот танкер, за кој се верува дека носи товар од илјадници тони гас.

Според малтешкиот премиер Роберт Абела, се подготвува итен план за справување со бродот, кој се наоѓа во меѓународни води на околу 110 километри од брегот на медитеранската островска држава. Од италијанска страна немаше потврда дека бродот се движи кон Лампедуза, пренесе ДПА.

Рускиот танкер се запали во близина на брегот на Либија во вторникот минатата недела по серија експлозии. Русија ја обвини Украина дека го нападнала бродот со беспилотно летало (дрон-чамец), при што претседателот Владимир Путин зборуваше за „терористички напад“.

Екипажот од 30 членови беше спасен. Либиската крајбрежна стража првично извести дека бродот потонал, но потоа се појавија фотографии на кои наводно се гледа оштетениот Arctic Metagaz со значителен наклон.

Според руски извори, танкерот испловил од руското пристаниште Мурманск со сите важечки документи и во согласност со меѓународните правила. Неодамна имаше повеќе инциденти со трговски бродови во Црното Море. На крајот на минатата година, украинските медиуми известија за експлозии на празни нафтени танкери таму, тврдејќи дека Киев користел морски дронови Sea Baby за нападите.

Русија води агресорска војна против Украина повеќе од четири години. Нападите со дронови се сметаат за дел од одбранбената борба на Украина.