Облози за прекин на огнот меѓу САД и Иран покажуваат знаци на инсајдерски информации, велат експерти
Во текот на изминатиот викенд од неколку сметки на онлајн платформата Polymarket се ставени облози со големи суми на прекин на огнот меѓу САД и Иран, што, според експерти, се чини дека постојат знаци на инсајдерски информации.
Осум сметки, сите новокреирани околу 21 март, се обложија вкупно со речиси 70.000 долари за прекин на огнот. Тие би можеле да заработат речиси 820.000 долари ако се постигне таков договор пред 31 март.
Сметка од која се ставаа облози беше креирана кратко пред САД да го нападнат Иран на 28 февруари. Таа, исто така, постави облог (и беше добитен) за тие напади, што покрена слични прашања околу инсајдерското тргување, и досега од таа сметка нема нови облози за ништо друго.
Сите нови сметки се создадени кон крајот на минатата недела, околу времето кога американскиот претседател, Доналд Трамп, прво најави нови напади и 48-часовен ултиматум за Иран, а потоа во пост на Truth Social сугерираше дека размислува за „смирување“ на воените операции.
Сметките на Polymarket се анонимни и исклучително е тешко да се пронајдат сопствениците на крипто паричниците што ги поставиле облозите, објави Гардијан.
Но, онлајн крипто набљудувачите и експертите сугерираа дека облозите носат знаци на инсајдерско тргување – и затоа што некои од сметките изгледале како да припаѓаат на еден инвеститор кој се обидува да го скрие својот идентитет со делење на својот облог помеѓу повеќе сметки.
Сопствената оценка на Polymarket за веројатноста за прекин на огнот пред 31 март значително се зголеми во последните неколку дена, од 6% на 21 март на 24% вчера. Моментално се обложуваат со повеќе од 21 милион долари на овој исход, објави Гардијан.
Една објава на социјални мрежи им предложи на корисниците да се обложуваат со „ДА“ на „Прекинување на огнот помеѓу САД и Иран до 31 март“, бидејќи три историски профитабилни трговци на платформата се обложиле со „да“, а еден историски непрофитабилен трговец се обложил со „не“.
Анонимен корисник заработил речиси 1 милион долари на Polymarket со десетици морничаво точни облози за тековната војна во Иран, објави денеска CNN.
Корисникот се обложил со точност од 93 проценти на теми како што е кога ќе се случат воздушни напади на САД и Израел во 2024, 2025 или 2026 година.
Ова не е прв пат луѓе кои се чини дека имаат инсајдерски информации да користат страници како Polymarket за да профитираат од насилни акти, јави CNN.
Неколку дена пред САД да го киднапираат венецуелскиот претседател Николас Мадуро во рација, еден корисник креирал сметка на Polymarket и се обложил со десетици илјади долари дека Мадуро ќе биде во американски притвор до крајот на месецот. Освоил повеќе од 400.000 долари.
