СБ на ОН расправа за заштита на пловидбата низ Ормуската Теснина
Членките на Советот за безбедност на Обединетите нации денеска почнаа преговори за резолуции за заштита на комерцијалната пловидба во и околу Ормуската Теснина, додека Бахреин предлага употреба на „сите неопходни средства“, на што Франција се противи, предупредувајќи дека таков текст тешко може да добие поддршка.
Дипломати наведуваат дека нацрт-текстот на Бахреин, кој е поддржан од заливските земји и Соединетите Американски Држави, предвидува употреба на сила преку формулацијата „сите неопходни средства“, што претставува стандарден дипломатски израз за одобрување воена акција. Франција, пак, понуди поумерен алтернативен текст, а преговорите се во тек за да се утврди дали е можно да се усогласат двата предлога.
Францускиот министер за надворешни работи, Жан-Ноел Баро, изјави дека не е извесно оти предлогот на Бахреин ќе ја добие потребната поддршка од членките, укажувајќи дека наредните денови ќе бидат клучни.
Нацртот на Бахреин ги опишува потезите на Иран како закана за меѓународниот мир и безбедност и предвидува овластување на државите, самостојно или преку мултинационални поморски коалиции, да ги применат „сите неопходни средства“ за обезбедување слободна пловидба и спречување на попречувањето на меѓународната навигација, вклучувајќи ги и територијалните води на земјите долж протокот. Исто така, се изразува подготвеност за воведување мерки, вклучувајќи и таргетирани санкции.
Амбасадорот на Бахреин во Франција, Есам ел Џасем, изјави дека разговорите се во рана фаза, оценувајќи дека меѓународните коалиции можат да придонесат за безбедноста на пловните патишта, но дека главно реагираат на настаните, без решавање на причините за ескалацијата. Во текстот на резолуцијата се бара Иран веднаш да ги прекине нападите врз трговските бродови и сите обиди за попречување на слободата на пловидбата во Ормуската Теснина.
Дипломатите, сепак, оценуваат дека се мали шансите таква резолуција да биде усвоена, бидејќи сојузниците на Иран, Русија и Кина, би можеле да стават вето. За усвојување на резолуцијата се потребни најмалку девет гласа „за“ и отсуство на вето од постојаните членки (Русија, Кина, САД, Велика Британија и Франција).
Францускиот нацрт не го споменува Иран и не е заснован на Поглавјето Седум од Повелбата на ОН, туку ги повикува сите страни на воздржаност, прекин на непријателствата во Персискиот Залив, Ормуската Теснина и Оманскиот Залив, како и враќање на дипломатијата. Наместо одобрување на употребата на сила, предлогот ги охрабрува државите заинтересирани за поморските рути да координираат исклучиво одбранбени мерки, вклучувајќи придружба на трговски бродови, со целосно почитување на меѓународното право и морското право.
