Случај „Крмзов“: Обвинетите се изјаснија за невини, одбраната тврди дека данокот е уредно платен

Одбраната, претставена преку адвокатот Ване Андреев, во воведните зборови истакна дека обвинителниот акт е неоснован и контрадикторен во делот на даночната евиденција.

„Одбраната ќе докаже дека сите договори за купопродажба на деловните простории за кои правните лица доставуваат фактури се уредно книжени во сметководствената евиденција како даночни обврзници. На истиот е уредно пријавен и платен ДДВ“, изјави Андреев.

Адвокатите тврдат дека нивното вештачење ќе докаже оти немало фиктивен промет, туку напротив – промети со зголемена цена на кои е платен данок на добивка.

Дополнително, одбраната укажа на лошата здравствена состојба на првообвинетиот Крмзов. Иако Обвинителството забележа дека досега не е доставена официјална медицинска документација за преиначување на притворот, судијата Илија Трпков одлучи рочиштата да бидат пократки од вообичаено за да се заштити здравјето на обвинетиот.