Претседателот Суљок ќе го предложи Петер Маѓар за премиер на конститутивната седница на унгарскиот Парламент

Унгарскиот претседател Тамаш Суљок денеска го прими на консултации претседателот на Партијата за почитување и слобода (Тиса), Петер Маѓар, чија партија освои најголем број места на парламентарните избори, најавувајќи дека ќе го номинира за премиер.

Суљок на социјалните мрежи изјави дека започнал дијалог со лидерите на партиите што влегоа во парламентот по изборите за пратеници, одржани во неделата.

„Прво, во палатата Шандор го примив Петер Маѓар, претседателот на Партијата за почитување и слобода, која освои најголем број пратенички места“, напиша претседателот Суљок.

Тој потсети дека една од клучните уставни должности на шефот на државата е свикување на конститутивната седница на новото свикување на Народното собрание.

„Го информирав претседателот на партијата Тиса дека ќе ја свикам конститутивната седница на парламентот што е можно поскоро по конечните, обврзувачки резултати од изборите, додека подготвителните консултации за седницата би можеле да започнат во наредните денови“, напиша Суљок.

Тој додаде дека, имајќи ги предвид јасните резултати од изборите, го информирал Петер Маѓар дека, во согласност со неговите уставни должности, формално ќе го предложи за функцијата премиер на конститутивната седница на Парламентот.

„Убеден сум дека конструктивната соработка меѓу уставните актери е она што им служи на интересите на Унгарија и унгарскиот народ“, заклучи Суљок.