Четири безживотни тела пронајдени на самата граница меѓу Хрватска и Словенија: „Имаше повеќе од 30, наредени како сардини…“, пренесуваат медиумите

Четири безживотни тела на мигранти и двајца тешко повредени беа пронајдени во местото Доње Прилишќе, на самата граница меѓу Хрватска и Словенија. Истрагата на хрватската полиција насочува на тоа дека жртвите се задушиле во тесен простор на комбе додека биле транспортирани од шверцери.

Според информациите до кои дојде „Јутарњи лист“, во возилото немало 19 лица како што првично се мислело, туку бројката била многу поголема.

„Имаше повеќе од 30, наредени како сардини…“, пренесува весникот детали од теренската истрага.

Се верува дека мигрантите, меѓу кои имало државјани на Египет и Бангладеш, патувале повеќе од три часа во ужасни услови пред да бидат истоварени на последната точка пред словенечката граница.

Доње Прилишќе е стратешка точка за мигрантската рута бидејќи таму Хрватска е „најтесна“ во однос на границата со БиХ, а во близина е и нечуваниот мост преку реката Купа. Мештаните велат дека иако групите се поретки, тие сега се многу поголеми.

„Сè уште доаѓаат во сите часови од денот, нема правила. Овие пристигнувања се поретки, но групите во кои поминуваат се поголеми, обично од 15 до 20 луѓе“, вели локален жител.

Сопственикот на последната куќа на рутата вели дека често забележува шверцери кои го фотографираат неговиот дом за да го користат како ориентација.

„Голем број луѓе доаѓаат со автомобил или мотор, застануваат и ја фотографираат мојата куќа. Таа е последна на рутата… Сигурен сум дека тие фотографии ги споделуваат шверцерските кругови како дестинација“, вели сопственикот за „Јутарњи“.

Полицијата во моментов трага по шверцерите поврзани со оваа трагедија, додека во болницата во Карловац се врши обдукција на телата за да се потврди точната причина за смртта.

Извор: press24.mk