Портал X: Полициска потера како во акционен филм во Арачиново, полицијата пукаше во населено место

Моменти на паника и тензии беа регистрирани во Арачиново за време на полициска потера која заврши со пукање од огнено оружје среде населено место. Жителите велат дека настанот предизвикал страв кај граѓаните, а дел од нив завршиле и во тешка емоционална состојба, известува ПорталX.

Според очевидци, полициската единица „Алфа“ бркала камион низ улиците на селото, по што се слушнале истрели од автоматско оружје.

„Тука се случи случај, единицата Алфа го бркаше камионот. Пукаа со оружје и ги исплашија децата. Има и бремени жени. Еве, и брзата помош дојде“, изјави еден жител.

Друг граѓанин вели дека членовите на неговото семејство доживеале шок од настанот.

„Мајката и сопругата… Поради тоа што дојде еден камион, ова возило беше зад него и потоа пукаа со калашников.“

„Таа се онесвести, со вода ја освестивме“, рече тој.

ПорталИкс разговараше и со полицајците кои учествувале во акцијата. Според нив, употребата на оружје била поради тоа што нивните животи биле загрозени, тврдејќи дека од камионот биле фрлани гуми и дрва кон полицијата.

Сепак, жителите на Арачиново го оспоруваат ова тврдење. Велат дека камионот дошол од планината и требало да биде запрен пред да влезе во населеното место.

Токму ова предизвика револт кај граѓаните, кои прашуваат зошто полицијата дозволила потерата да продолжи меѓу куќи и граѓани пред да употреби оружје.

Реакции има и за начинот на кој била спроведена акцијата. Жителите велат дека полициското возило немало никакви ознаки, а полицајците не биле во униформи.

Снимките од местото на настанот покажуваат полицајци со калашникови на сред улица, што според граѓаните повеќе наликувало на пресметка меѓу банди отколку на официјална полициска акција.

„Сирена може да купи секој на пазар“, велат жителите, додавајќи дека во вакви ситуации тешко може да се препознае дали станува збор за полиција или вооружени цивили.

Граѓаните бараат објаснување од институциите за начинот на кој е спроведена акцијата, употребата на оружје во населено место и недостатокот на јасна идентификација на полицајците кои учествувале во потерата, известува ПорталX.