Трамп се премисли: Повторно ги вклучи митинзите во Ајова и Канзас пред меѓуизборите во САД

Американскиот претседател Доналд Трамп повторно ги вклучи во својот распоред претходно откажаните предизборни митинзи во сојузните држави Ајова и Канзас, само неколку дена пред клучните меѓуизбори за Конгресот на САД закажани за 3 ноември, соопшти претставник на Белата куќа.

– Митинзите повторно се во распоредот! Претседателот Трамп ги сака своите поддржувачи и, покрај речиси 20 предизборни настани преку видеоконференција во недела, ќе одржи митинзи еден по друг во Канзас и Ајова – изјави претставникот на Белата куќа.

Промената во агендата следува откако Трамп вчера изјави дека не смета оти е неопходно да го посети Канзас, каде што републиканскиот сенатор Роџер Маршал се соочува со неочекувано неизвесна трка со демократскиот кандидат Адам Хамилтон, уверувајќи дека тој „се справува многу добро“ и дека во вторник ги очекува одлична изборна вечер.

Претставникот на Белата куќа појасни дека распоредот бил прилагоден за настаните да се усогласат со неодамна додадените предизборни средби на претседателот со гласачите на далечина, преку видеоконференција.

Трамп денеска учествува на предизборен настан во сојузната држава Флорида, каде што се надева дека ќе ги мобилизира своите поддржувачи. Иако на претседателските избори во 2024 година тој оствари убедлива победа во оваа држава, во тековното предвремено гласање засега водство имаат демократите.

Тоа е само дел од турнејата на Трамп низ сојузни држави во кои прогнозите вообичаено предвидуваат победа на републиканците, по неговите предизборни настапи претходно оваа недела во Мисисипи и во Јужна Каролина.