СДСМ: Оставката на Груевска-Маџоска е доказ за распадот на културната политика на Љутков

10.06.2026 09:21
554 1 минута читање
Опозицискиот Социјалдемократски сојуз на Македонија (СДСМ), преку соопштение од Комисијата за култура, упати остри критики до министерот за култура и туризам, Зоран Љутков, по неотповикливата оставка на претседателката на Советот за македонски јазик, проф. д-р Симона Груевска-Маџоска. Од опозициската партија обвинуваат дека овој чин е јасен показател за распадот на културната политика во државата и бараат итна отчетност од надлежните.

Од СДСМ реагираат на одлуката на министерот Љутков да одбие да ги коментира причините за оставката, сведувајќи ја целата ситуација на рутинска административна процедура и обична кадровска промена.

„Оставката на личност што ја предводеше институцијата задолжена за јазичната политика не може да се третира како обична административна процедура. Ова се случува во период кога македонскиот јазик се соочува со голем број предизвици – од неговата институционална заштита до потребата од спроведување долгорочна национална стратегија. Наместо обединување на стручната јавност, сведочиме за конфликт што резултира со заминување на истакнат експерт“, се вели во соопштението на СДСМ.

Опозицијата јавно отвара неколку сериозни прашања до Министерството за култура и туризам: дали стручните мислења на професорите биле свесно игнорирани, дали Советот за македонски јазик бил изложен на директни политички притисоци и дали ресорното министерство воопшто ја разбира важноста на јазичната политика како прашање од врвен национален интерес.

Според СДСМ, овој случај не е изолиран инцидент, туку е дел од пошироката негативна слика и атмосфера на неизвесност и недоверба што министерот Љутков ја создава во ресорот од почетокот на својот мандат.

„Наместо да ги продолжи позитивните политики воспоставени со Законот за употреба на македонскиот јазик и мерките за институционална заштита на македонскиот идентитет, вниманието го насочува кон кадровски и институционални судири“, обвинуваат од опозицијата.

Од партијата порачаа дека нема да дозволат овие процеси во културата да бидат игнорирани, маргинализирани или занемарени од страна на извршната власт. Најавуваат дека во претстојниот период преку сите механизми ќе бараат целосно разјаснување на причините за заминувањето на проф. Симона Груевска-Маџоска, како и јасен одговор за иднината на државните стратегии поврзани со македонскиот јазик.

На крајот од соопштението, СДСМ заклучува дека македонскиот јазик, културата и идентитетот се темелни национални вредности кои не смеат да бидат жртва на лошо управување, институционална негрижа или политички суети, порачувајќи дека гласно и одлучно ќе ги бранат истите секогаш кога ќе бидат доведени во прашање.

Back to top button
Close