Србија: Ратко Младиќ, осуден за геноцид и воени злосторства, ќе виде погребан со сите воени и државни почести

Српскиот министер за правда Ненад Вујиќ во петокот изјави дека поранешниот командант на Војската на Република Српска и осуден воен злосторник Ратко Младиќ „ќе ги добие сите воени и државни почести што му следуваат“.

Младиќ почина во четвртокот додека издржуваше доживотна затворска казна во Хаг за воени злосторства извршени за време на војната во Босна и Херцеговина во 1990-тите години.

„Сигурно е дека генерал Младиќ ќе ги добие сите воени и државни почести што му следуваат, кога станува збор за државата“, изјави Вујиќ за телевизијата К1.

Осуден за геноцид и злосторства против човештвото

Младиќ издржуваше доживотна казна затвор за геноцид, воени злосторства и злосторства против човештвото извршени за време на војната во Босна и Херцеговина.

Меѓу злосторствата за кои беше осуден е и неговата улога во масакрот во Сребреница, кој се смета за најтешкото крвопролевање во Европа по Втората светска војна.

Поради злосторствата извршени во периодот на распадот на поранешна Југославија, меѓународните медиуми го нарекоа „касапот од Босна“.

Војната во Босна и Херцеговина, која траеше од 1992 до 1995 година, однесе околу 100.000 животи и остави 2,2 милиони луѓе раселени.

Младиќ беше воениот дел од тројката која доминираше во босанскиот конфликт, додека политичкото водство го претставуваа поранешниот претседател на Србија и Сојузна Република Југославија, Слободан Милошевиќ, и поранешниот лидер на босанските Срби, Радован Караџиќ. (Dw)