За влез во Македонија од Грција се чека околу час и половина

Големи колони вечерва се формираа на граничниот премин Евзони-Богородица, на влез во Македонија од Грција. Според сведоштва на патници, чекањето попладнево и вечерва е околу час и половина, а колоната на грчка страна се протега од патарината до граничниот премин.

Зголемениот сообраќај се совпаѓа со крајот на продолжениот викенд и враќањето на голем број македонски туристи од Грција. Во колоната, покрај возила со македонски регистарски таблички, има и автомобили од Србија, Унгарија и Германија.

Слична е состојбата и на преминот Дојран, додека според информациите од терен најмало задржување има на Меџитлија, каде за влез во Македонија се чека околу десетина минути.

АМСМ во своите официјални информации наведува дека сообраќајот на патиштата надвор од градските средини е со зголемен интензитет, но од македонска страна на Богородица не е пријавено подолго задржување. Тоа не е во спротивност со информациите за колоните на Евзони, бидејќи најголемиот застој во моментов се создава на грчка страна пред влезот во Македонија.

Патниците кои се враќаат од Грција треба да сметаат на подолго патување и можни дополнителни задржувања во вечерните часови, кога се очекува продолжен бран на возила кон Македонија.