САД и сојузниците ги повикуваат МААЕ да усвои резолуција за внесување на прашањето за збогатениот ураниум од Иран во Советот за безбедност на ОН
САД и нивните сојузници Велика Британија, Франција и Германија вршат притисок врз други земји во управниот совет на Меѓународната агенција за атомска енергија (МААЕ) да усвојат следната недела резолуција, со која прашањето за збогатениот ураниум од Иран за првпат по 20 години би било внесено во Советот за безбедност на ОН, соопштија денеска дипломати.
Доколку биде усвоена, резолуцијата ќе ја следи онаа од 12 јуни минатата година, со која беше објавено дека Иран ги прекршува своите обврски според Договорот за неширење на нуклеарно оружје, бидејќи не соработува целосно во истрагата за траги од ураниум пронајдени во недекларирани објекти.
Следниот ден Израел почна да ги бомбардира иранските нуклеарни објекти, а наскоро му се приклучија и САД, уништувајќи или нанесувајќи сериозни штети на фабриките за збогатување ураниум во Иран. Оттогаш Иран не им дозволи на инспекторите на МААЕ да се вратат во бомбардираните објекти или да проверат колкав дел од неговите резерви на збогатен ураниум останале, при што дел од ураниумот е збогатен до 60 проценти – чистота малку под нивото потребно за производство на нуклеарно оружје.
Доколку 35-члениот управен совет на МААЕ ја усвои резолуцијата за внесување на прашањето за Иран во Советот за безбедност, тоа би било кулминација на продолжениот спор за пристапот на МААЕ до овие објекти. Во текот на изминатата година управниот совет усвои две резолуции со кои побара од Иран да ги декларира своите резерви на збогатен ураниум и да обезбеди целосен пристап на МААЕ за да бидат проверени.
Предлог-резолуцијата сè уште не е официјално внесена во управниот совет, а преговорите меѓу земјите за точната формулација продолжуваат, соопштија дипломатите. Обично предлогот се поднесува официјално на почетокот на неделата во која се одржува седницата на управниот совет.
Како земја потписничка на Договорот за неширење на нуклеарно оружје, Иран има право да развива нуклеарни технологии, вклучително и да збогатува ураниум за мирни цели. Иран изјавува дека никогаш нема да произведува нуклеарно оружје. Сепак, таа е единствената земја која збогатува ураниум до 60 проценти без да има произведено нуклеарно оружје.
Количината на ураниум што Иран ја збогатил до ова ниво е „сериозна причина за загриженост“ за нуклеарниот надзорен орган. МААЕ смета дека повеќе од 200 килограми од овој високо збогатен ураниум преживеале по бомбардирањата и се наоѓаат во комплекс од тунели крај Исфахан и во објектот во Натанц.
