Над 300 повредени на студентските протести во Тирана, меѓу нив 191 полицаец

Вкупно 310 лица се повредени од почетокот на студентските протести во Тирана на 13 октомври, соопштија албанските здравствени власти. Меѓу нив има 191 полицаец, 88 демонстранти и 31 случаен минувач.

За време на синоќешните демонстрации, медицинска помош побарале седум лица, меѓу кои полицаец, малолетен демонстрант, медиумски работници и минувачи, објави „Еуроњуз Албанија“.

Според податоците објавени во 21 часот, четворица минувачи биле примени во Универзитетската болница за трауматологија. Еден од нив, претставник на меѓународен медиум, бил пуштен по укажаната помош и не е во животна опасност. Уште еден минувач ја напуштил болницата по лекувањето, додека двајца останале на дополнителни прегледи.

Во Универзитетскиот болнички центар „Мајка Тереза“ помош побарале полицаец, малолетен демонстрант и медиумски работник. Сите тројца се во стабилна здравствена состојба.

Во меѓувреме, за денеска во 9 часот е закажан состанок на пратеничката група на Социјалистичката партија во албанското Собрание, на кој ќе присуствува и премиерот Еди Рама. Според информациите на новинарката Ексиола Шеху, се очекува Рама да претстави мерки против лицата одговорни за насилните инциденти за време на протестите.

Протестите продолжуваат да предизвикуваат загриженост поради големиот број повредени, меѓу кои има полицајци и граѓани кои не учествувале во демонстрациите.