Теута Арифи по рочиштето: „Невина сум, не сум направила намерни грешки“

Пред тетовскиот суд денеска започна судскиот процес против поранешната градоначалничка на Тетово, Теута Арифи, која се товари за злоупотреба на службената положба и овластување во врска со склучување договори во Општината.

На првото рочиште сведочеа четири лица кои во минатото биле ангажирани за договори во различни општински сектори, како и тројца внатрешни ревизори на Општина Тетово.

Според обвинението, поднесено по жалба од Општина Тетово, Арифи се товари дека го оштетила општинскиот буџет за околу еден милион евра преку склучување 546 договори. Од нив, за 268 лица немало извештаи за извршената работа, додека за останатите 248 такви извештаи биле евидентирани.

По завршувањето на рочиштето, Арифи изјави дека е невина и дека не направила намерни пропусти. Таа ја оцени постапката како последица на кривична пријава поднесена од актуелното раководство на Општината.

„Вие бевте внатре, ги слушнавте сведоците кои сведочеа дека отишле, биле на работа. Ниско и срамно е што граѓаните на овој град кои завршиле работа, каква и да е, се носат и влечат на суд за да земат изјави од нив“, изјави Арифи.

Таа додаде дека секогаш се обидувала да им помогне на сограѓаните и дека ќе го следи судскиот процес.

„Нема проблем, не сум направила никакви намерни грешки. Секогаш се обидував да им бидам од помош на моите сограѓани. Ќе го следам процесот и верувам дека судските власти ќе имаат интегритет да одлучат правилно за секој граѓанин на оваа земја“, порача поранешната градоначалничка.

Back to top button
Close