Захарова: Француските војници во Украина ќе бидат легитимна цел на руската армија

Доколку Франција испрати свои војници во Украина, тие неизбежно ќе станат цел на руските вооружени сили, предупреди портпаролката на руското Министерство за надворешни работи, Марија Захарова.
Нејзината изјава доаѓа по претходните најави на францускиот претседател Емануел Макрон, кој во февруари изјави дека не ја исклучува можноста за испраќање француски војници во Украина.
Захарова оцени дека реториката на Макрон е поврзана со неговата намера да создаде таканаречена „стратешка неизвесност“ за Русија.
„Доколку Французите се појават во зоната на конфликтот, тие неизбежно ќе станат цел на руските вооружени сили“, изјави Захарова.
Таа додаде дека Москва не е изненадена од изјавите на официјален Париз, оценувајќи дека француското раководство ја користи тезата за руска закана за да ги оправда зголемените воени трошоци.
Изјавите на Захарова се дел од низата реакции на Москва на можноста за поголемо воено присуство на западните земји во Украина, идеја што францускиот претседател Макрон ја отвори во јавноста.
Во меѓувреме, руските власти повеќепати предупредија дека присуството на странски воени сили на украинска територија би го сметале за директно мешање во конфликтот.






