Баро за можната кандидатура на Орбан за генерален секретар на ОН: Таа функција не е наменета да биде утешна награда за лидер поразен на избори
Министерот за надворешни работи на Франција Жан-Ноел Баро вчера изјави дека Франција очекува следниот шеф на ОН да го реформира и зајакне светското тело.
– Она што го очекуваме од идниот генерален секретар е тој да може да ги реформира Обединетите нации со цел да ги зајакне, а не да ги дискредитира со цел повеќе да ги закопа – изјави Баро пред францускиот Сенат.
Баро рече дека Франција нема да прифати напори од страна на големите сили за слабеење или парализирање на ОН, кои ги опиша како организација основана за да им служи на мирот, развојот и човековите права.
На пратеничко прашање дали Франција би го поддржала предлогот на САД, Виктор Орбан да биде генерален секретар на ОН, Баро рече „не“.
– Функцијата генерален секретар на Обединетите нации не е наменета да биде утешна награда за лидер поразен на изборите, сменет од сопствениот народ – изјави Баро во Сенатот.
Тој нагласи дека Франција не може да прифати Обединетите нации – организација основана за мир, развој и човекови права – да бидат ослабени или парализирани од големи сили кои сакаат да го наметнат „законот на посилниот“.
Баро истакна дека меѓународната соработка преку ОН е клучна за справување со современите предизвици како војните, климатските промени и пандемиите.
Тој изјави дека меѓународната соработка и мултилатерализмот се од суштинско значење за заштита на луѓето од закани кои ги вклучуваат војната, вештачката интелигенција, климатските промени и пандемиите.
Како членка на Советот за безбедност, Франција се залага за реформирање и зајакнување на ОН, вклучувајќи ограничување на правото на вето за заштита на цивилите во конфликтни региони како Украина, Газа и Судан, а не за нивно дискредитирање, повтори Баро.
Анализирајќи го настапот на Баро во Сенатот на 28 октомври 2026 година, некои француски медиуми нагласија дека Париз испратил остра политичка порака против кандидатурата на Орбан поддржана од администрацијата на Трамп, потсетувајќи дека Франција, како постојана членка на Советот за безбедност, има клучна улога и моќ да влијае или да го блокира изборот на кадри кои би ги загрозиле вредностите и мултилатерализмот на ОН.
Веста за можна кандидатура на Орбан за генерален секретар на ОН меѓу првите ја објави „Волстрит џурнал“ кој наведе дека одредени кругови и функционери од администрацијата на американскиот претседател Доналд Трамп го поттикнувале и лобирале Орбан да се кандидира за оваа висока позиција.
Според тие извештаи, идејата била тој да биде потенцијален заеднички или компромисен кандидат кој би можел да добие поддршка и од светските сили како Русија и Кина, но ваквата замисла предизвика и големи реакции и дебати во меѓународната јавност.
