Бланар: Словачка е против какви било двојни стандарди во пристапувањето кон Европската Унија

-Ние не можеме да прифатиме дека во европската интеграција која е поставена на ЕУ стандарди има различни критериуми Треба да дадеме јасен сигнал на регионот дека членството во Европската Унија е реално, во спротивно, фрустрацијата на земјите кандидати ќе расте и поради тоа е можно да го изгубиме овој регион – изјави министерот за надворешни и европски работи на Словачката Република, Јурај Бланар, на заедничката прес-конференција со министерот за надворешни работи и надворешна трговија Тимчо Муцунски.

Бланар нагласи дека Словачка е против било какви двојни стандарди во пристапниот процес.

-Ние не можеме да прифатиме дека во европската интеграција која е поставена на ЕУ стандарди има различни критериуми за различни држави. Северна Македонија може да смета на големата поддршка на Словачка во евроинтеграцијата. Ова е наша улога којашто ја потврдивме уште на Самитот во Солун во 2004 година, но денес може да кажеме дека не се исполнува тоа што беше договорено на тој самит – рече Бланар.

Шефот на словачката дипломатија ја посочи нашата земја како успешен пример во имплементацијата на Планот за раст и рече дека Владата на С. Македонија е многу посветена за реформите во евроинтегративниот процес, дека е мотивирана и стабилна, за да го доведе до крај овој процес.

-Имаме одлични политички односи, како и заеднички став за многу геополитички теми. Словачка и С. Македонија се мали земји и за нас е многу важно да ја одржуваме стабилноста и безбедноста и почитувањето на меѓународното право. Сведоци сме дека прекршувањето на меѓународното право не е во наш интерес – посочи Бланар.

Тој истакна дека му е чест што е во посета на Македонија, која, како што рече, ни е блиска со традициите кои се уште од време на Кирил и Методиј и до ден денес и ова е нешто коешто не спојува.

-Треба да ја зајакнеме соработката и за таа цел тука е и словачката министерка за култура, којашто ќе потпише Меморандум за соработка во културата. Но сакаме да ја прошириме соработката и во други области и сакаме да ја трансформираме во добра економска соработка. Словачка е лидер во авто-индустријата и затоа сметам дека соработката во автомобилската индустрија може да има капацитет – истакна Бланар.

Главен фокус на разговорите беше ставен на натамошното унапредување на билатералните односи и реафирмирањето на словачката поддршка на нашиот процес на европска интеграција. На средбата беше заеднички оценето дека односите меѓу двете земји се на високо ниво, при што беше изразен особен интерес за продлабочување на економската соработка и привлекување нови инвестиции.

Министерот Муцунски ја истакна важноста на принципиелната поддршка од Словачка за европската перспектива на Западен Балкан и за полноправното членство на нашата земја во Европската Унија.