Франција ќе симулира голем прекин на електричната енергија

Француската влада планира да спроведе симулација на голем прекин на електричната енергија низ целата земја во втората половина на 2027 година за да ја тестира својата подготвеност за кризни ситуации, соопштија денес извори запознаени со подготовките.

Во вежбата ќе учествуваат операторите на електричната мрежа Enedis и RTE, неколку државни институции, министерства и француската воена администрација, објави денес бриселскиот „Политико“.

Целта на симулацијата ќе биде да се тестира способноста на земјата да одговори на сценарио на голем прекин на електричната енергија, како што е затемнувањето што ги погоди Шпанија и Португалија во април 2025 година, или голем кибернапад врз енергетската инфраструктура.

Според изворите, вежбата ќе процени колку време е потребно за да се врати снабдувањето со електрична енергија и колку добро земјата е во состојба да обезбеди континуитет на основните услуги за време на криза.

Француската влада, исто така, ќе работи на обезбедување на залихи неопходни за функционирање на државата и заштита на населението, вклучувајќи генератори, лекови, телекомуникациска опрема, опрема за итни служби и оскудни суровини, според записите од состанокот.Франција беше погодена од екстремна топлина и шумски пожари ова лето.

На југозападот од земјата, големите шумски пожари предизвикаа масовни евакуации на повеќе од 200.000 луѓе, додека во Париз, властите побараа дополнителни залихи од мраз за службите за итни случаи за време на топлотниот бран.

Опозиционите партии ја критикуваа владата за, како што велат, недоволна подготвеност за кризни ситуации.

Францускиот премиер Себастијан Ле Корнеј објави дека владата ќе предложи закон до парламентот за подобрување на системот за одговор во итни случаи.