Генерал Каволи: Русија загуби повеќе од 4.000 тенкови во Украина од 2022 година

– Од почетокот на војната во Украина во 2022 година Русија загуби повеќе од 4.000 тенкови, изјави денеска американскиот генерал Кристофер Каволи за време на сослушувањето во Сенатот.

Русија започна инвазија на Украина на 24 февруари 2022 година, надевајќи се на брза победа. Меѓутоа, украинскиот отпор го претвори конфликтот во долга и исцрпувачка војна за време на која Русија претрпе големи човечки и материјални загуби.

-Русите изгубија повеќе од 4.000 тенкови, што е речиси еквивалент на американските резерви. Обемот на овој конфликт е едноставно запрепастувачки, рече генералот Каволи, командант на американските сили во Европа.

Генералот одговори на прашање во Сенатот за влијанието на паузата на американската воена помош за Украина, како и за суспензијата на размената на разузнавачки податоци, што ја воведе претседателот Доналд Трамп на почетокот на март, по расправијата на средбата во Белата куќа со неговиот украински колега Володимир Зеленски.

-Очигледно, тоа би имало брзо и штетно влијание врз нивната (Украина) способност за борба, рече американскиот генерал, додавајќи дека украинската војска зависи од помошта на Вашингтон во уништувањето на руските ракети, како и од нејзините разузнавачки информации за лоцирање руски командни пунктови и логистички цели за напад.

Од почетокот на војната САД обезбеди воена помош од десетици милијарди долари за Украина, но не најавија нова помош откако Трамп ја презеде функцијата на 20 јануари