Група родители на ученици на ОУ „Кочо Рацин“ апелираат, но ниту управата на училиштето ниту градоначалникот на Општина Центар не се одзиваат на апелите

​Родителите на учениците од основното училиште „Кочо Рацин“ во Скопје упатуваат јавен и последен апел до раководството на училиштето и до Општина Центар поради алармантните и небезбедни услови во кои децата треба да ја започнат новата училишна година. И покрај бројните обиди за комуникација, надлежните институции досега остануваат целосно глуви на барањата за итно решавање на проблемите кои директно ја загрозуваат безбедноста на најмладите.

​Клучни проблеми со кои се соочуваат учениците:

Небезбедна и заглавена санација:

Пред точно три недели беше заграден дел од бетонската ограда со цел нејзина санација. Оградата со години стоеше накривена, пукната и со бетонски парчиња кои висеа, претставувајќи постојана опасност. Сепак, откако е поставена заштитната ограда, на терен не се изведуваат никакви градежни работи, а новата учебна година почнува за само неколку дена.

​Загрозен пешачки сообраќај:

Самото заградување е изведено без соодветни стандарди и предупредувачки сообраќајни ознаки. Пешачкиот дел е целосно блокиран, поради што децата се принудени да се симнуваат директно на коловозот и да пешачат по улицата во најфреквентните периоди од денот, со сериозен ризик да бидат удрини од возило.

​Хигиенски хаос и расфрлани контејнери:

Околу училишниот двор контејнерите се расфрлани и преполни. За време на одморите, децата се принудени да поминуваат покрај ѓубре од кое се шири неподнослива смрдеа, што претставува директна закана по нивното здравје и ризик од заразни болести.

​Запуштен двор и обраснато зеленило:

Задниот дел од училиштето е целосно обраснат со дива вегетација. Неискастреното зеленило драстично ја намалува прегледноста, ја попречува проодноста и создава дополнителен ризик за движењето на децата.

Поради тоталната незаинтересираност и пасивност на дирекцијата на ОУ „Кочо Рацин“ и градоначалникот на Општина Центар, родителите нагласуваат дека ова е последно јавно предупредување пред да се случи несакан инцидент со повредени ученици.

​Доколку надлежните веднаш не излезат на терен и не ги отстранат опасностите пред почетокот на наставата, родителите најавуваат дека од првиот училишен ден ќе започнат со целосен бојкот на наставата. Безбедноста и здравјето на децата се црвената линија преку која нема да се премине.