Хигиеничарка во Конзулатот на Бугарија во Битола интервјуирала кандидати за државјанство и затоа имало многу одбиени, се жалат од Преродба.

Хигиеничарка во Конзулатот на Бугарија во Битола вршела интервјуа со кандидати за добивање бугарско државјанство, откри пратеникот од бугарската партија Преродба, Ангел Георгиев. Како што пренесуваат денеска медиумите во Бугарија, на оваа негова забелешка и пратеничко прашање, вицепремиерката и шефица на дипломатијата Марија Габриел потврдила дека имало системски пропусти во бугарскиот конзулат во Битола, и дека таа веќе нема пристап до архивата и конзулската служба.

Според Габриел, од увидот направен во конзулатот, не биле утврдени директни докази дека жената ангажирана како хигиеничарка ги интервјуирала кандидатите за бугарско државјанство, но потврди дека имало „застрашувачки прекршувања“ кои се недозволиви во дипломатските служби.

Габриел посочила дека 2.719 досиеја се вратени на докомплетирање во Генералниот конзулат во Битола и оти се откриени сериозни неправилности во процесот на доделување бугарско државјанство.

Случајот бил откриен откако на почетокот на февруари се појавиле извештаи за неправилности во конзулатот.

– По темелно испитување, изготвен е извештај со евалуација и анализа на собраните документи и информации, кои откриваат застрашувачки неправилности во однос на процедурите кои се критични за работата на секој конзулат, истакнала Габриел.

Пратеникот Георгиев тврди дека хигиеничарката Весна Котевска, вработена во бугарскиот конзулат вршела интервјуа со кандидати и како резултат на тоа имало многу одбивања.

Бугарското национално радио јави дека извештајот од контролата во Конзултатот во Битола е испратен до Инспекторатот на Министерството за правда и оти се очекуваат санкции за одговорните.