ИДФ ги заврши подготовките за прифаќање на заложниците

Израелските безбедносни сили соопштија дека ги завршиле подготовките за прием на заложниците што треба да бидат ослободени од Појасот Газа, во операцијата наречена „Рајска врата“.

Откако ќе бидат ослободени од Појасот Газа преку Египет, заложниците ќе бидат донесени од ИДФ во воздухопловната база Хацерим во јужен Израел на првичен прием, каде што ќе бидат подложени на краток физички и ментален преглед.

Војската подготви психолози и експерти за ментално здравје да ги пречекаат заложниците, од кои многумина се деца. Експертите ќе им објаснат што се случило во нивната заедница на 7 октомври кога ќе сметаат дека е вистинското време, јави тајмс од Израел.

ИДФ донесе телефони за заложниците за да можат веднаш да им се јават на своите роднини по пристигнувањето во Хацерим.

Ослободените заложници ќе останат до два часа во Хацерим пред да бидат однесени во болница, со хеликоптер или со минибус. Хеликоптерите ќе летаат во поудобен и потивок режим.

Оние на кои им е потребна итна медицинска помош ќе бидат однесени директно од граница во болница, без да одат во Хацерим.

Семејствата на заложниците чекаат во болниците, а во околината се резервирани хотелски соби.

Детската болница Шнајдер препорача заложниците да останат под опсервација најмалку 48 часа пред да бидат пуштени дома.

Истиот процес ќе биде спроведен во следните четири дена за преостанатите заложници кои ќе бидат ослободени од заробеништво на Хамас.

ИДФ во соопштение бара од јавноста „да покаже трпение и чувствителност и да ја почитува приватноста на ослободените заложници и нивните семејства“ и да не циркулира непроверени информации.