Инцидент на дива депонија во Шуто Оризари: Инспектор од Град Скопје пријавил закани од градоначалникот, пријава поднел и Дудуш

Вработен како инспектор во Град Скопје, вчера во 10:30 часот пријавил во полиција дека на улица „2“ без број во близина на дива депонија, при вршење на службени дејствија за вршење надзор и подигање на мостри, дошле две лица. Според пријавата, едно од лицата било К.Д., градоначалник на Шуто Оризари, кој почнал да ги навредува него и неговите колеги и да им се заканува и го попречувал земањето на мостри.

Како што се наведува во денешниот МВР-билтен, вчера попладне во 13:10 часот во Полициското одделение Шуто Оризари пријава поднел и К.Д. (50) од Скопје, градоначалник на Шуто Оризари.

Тој пријавил дека за време на инспекциски надзор на отпад од страна на вработени во Град Скопје, кој бил сместен на неговиот имот на подрачјето на Шуто Оризари, Ф.С. (47) од Скопје, вработен во град Скопје, му упатувал закани.

Полицијата работи на расчистување на случајот. мд/