Израел најави остар одговор на нападите на Хамас

По ракетните напади на Хамас врз јужен Израел, израелската влада одлучи да го затвори пешачкиот премин во Газа, а министерот за одбрана и вицепремиер на Израел Бени Ганц вети „остар одговор“.

Канцеларијата за врски на израелската војска со палестинските власти објави дека овој премин нема да биде отворен за палестинските работници во наредната недела, откако во четвртокот беше затворен поради празникот Пасха.

– По ракетите кои синоќа беа истрелани врз израелска територија од Појасот Газа, беше одлучено дека оваа недела нема да биде дозволен влез во Израел на трговците и работниците од Газа преку преминот Ерез, изјави координаторот на владините активности на териториите под палестинска управа познат по неговиот акроним COGAT.

Се наведува дека од тој режим ќе бидат исклучени хуманитарни и други нерешени случаи, со одобрение на воената канцеларија за врски.

Бројот на Палестинците од Појасот Газа кои можат да работат во Израел минатиот месец се зголеми на 12.000, но владата во Ерусалим најави дека ќе го зголеми тој број за дополнителни 8.000, на вкупно 20.000.