Купиштата смет оставени на земја околу контејнерите во Тетово претставуваат голема опасност за здравјето

Куповите смет оставени на земја околу преполните контејнери во Тетово претставуваат голема опасност за здравјето на граѓаните, алармираат стручните лица. Комуналната општинска служба секојдневно го собира сметот од контејнерите, но постојат и голем број места каде што нема садови за одлагање отпад, па се создаваат мини-депонии.

Ратко Давидовски, специјалист по хигиена и здравствена екологија при Центарот за јавно здравје во Тетово, за МИА вели дека секоја органска материја на овие високи температури многу бргу се распаѓа, и на тој начин, според него, се развиваат сите можни бактерии што можат да доведат до сериозни последици по здравјето на луѓето.

Притоа, истакнува Давитковски, најопасен вид на отпад по човековото здравје се остатоци од домашни животни, коски со парчиња месо, делови од храна и слични органски материи.

-Сето тоа се распаѓа и станува извор на бактерии и вируси. Не само месото, туку и лубеница, на пример. Сѐ што е органско се распаѓа и овозможува да се развиваат многу бактерии. Имаме спектар бактерии, од кои најчести се некои како ешерихија коли, ентеро бактерии, полиформни бактерии, салмонела, клостридиум, нема бактерија што не е присутна на таа температура – објаснува тој.